ശ്രീമദ് നാരായണീയം
ഭക്തി പ്രാർത്ഥന
പഠന്തോ നാമാനി പ്രമദഭരസിന്ധൗ നിപതിതാ:
സ്മരന്തോ രൂപം തേ വരദ കഥയന്തോ ഗുണകഥാ:
ചരന്തോ യേ ഭക്താസ്ത്വയി ഖലു രമന്തേ പരമമൂ-
നഹം ധന്യാന് മന്യേ സമധിഗതസര്വ്വാഭിലഷിതാന് 1
ഗദക്ലിഷ്ടം കഷ്ടം തവ ചരണസേവാരസഭരേ-
പ്യനാസക്തം ചിത്തം ഭവതി ബത വിഷ്ണോ കുരു ദയാം
ഭവത്പാദാംഭോജസ്മരണരസികോ നാമനിവഹാ-
നഹം ഗായം ഗായം കുഹചന വിവത്സ്യാമി വിജനേ 2
കൃപാ തേ ജാതാ ചേത്കിമിവ ന ഹി ലഭ്യം തനുഭൃതാം
മദീയക്ലേശൗഘ പ്രശമനദശാ നാമ കിയതീ
ന കേ കേ ലോകേസ്മിന്നനിശമയി ശോകാഭിരഹിതാഃ
ഭവദ്ഭക്താ മുക്താ: സുഖഗതിമസക്താ വിദധതേ 3
മുനിപ്രൗഢാ രൂഢാ ജഗതി ഖലു ഗൂഢാത്മഗതയോ
ഭവത്പാദാമ്ഭോജസ്മരണവിരുജോ നാരദമുഖാ:
ചരന്തീശ സ്വൈരം സതതപരിനിര്ഭാതപരചിത് –
സദാനന്ദാദ്വൈതപ്രസരപരിമഗ്നാ: കിമപരം 4
ഭവദ്ഭക്തിഃ സ്ഫീതാ ഭവതു മമ സൈവ പ്രശമയേ-
ദശേഷക്ലേശൗഘം ന ഖലു ഹൃദി സന്ദേഹകണികാ
ന ചേദ്വ്യാസസ്യോക്തിസ്തവ ച വചനം നൈഗമവചോ
ഭവേന്മിഥ്യാ രഥ്യാപുരുഷവചനപ്രായമഖിലം 5
ഭവദ്ഭക്തിസ്താവത് പ്രമുഖമധുരാ ത്വത് ഗുണരസാത്
കിമപ്യാരൂഢാ ചേദഖിലപരിതാപപ്രശമനീ
പുനശ്ചാന്തേ സ്വാന്തേ വിമലപരിബോധോദയമില-
ന്മഹാനന്ദാദ്വൈതം ദിശതി കിമത: പ്രാര്ത്ഥ്യമപരം 6
വിധൂയ ക്ലേശാന്മേ കുരു ചരണയുഗ്മം ധൃതരസം
ഭവത്ക്ഷേത്രപ്രാപ്തൗ കരമപി ച തേ പൂജനവിധൗ
ഭവന്മൂര്ത്ത്യാലോകേ നയനമഥ തേ പാദതുളസീ-
പരിഘ്രാണേ ഘ്രാണം ശ്രവണമപി തേ ചാരുചരിതേ 7
പ്രഭൂതാധിവ്യാധിപ്രസഭചലിതേ മാമകഹൃദി
ത്വദീയം തദ്രൂപം പരമസുഖചിദ്രൂപമുദിയാത്
ഉദഞ്ചദ്രോമാഞ്ചോ ഗലിതബഹുഹര്ഷാശ്രുനിവഹോ
യഥാ വിസ്മര്യാസം ദുരുപശമപീഡാപരിഭവാന് 8
മരുദ്ഗേഹാധീശ ത്വയി ഖലു പരാഞ്ചോപി സുഖിനോ
ഭവത്സ്നേഹീ സോഹം സുബഹു പരിതപ്യേ ച കിമിദം
അകീര്ത്തിസ്തേ മാ ഭൂദ്വരദ ഗദഭാരം പ്രശമയന്
ഭവത് ഭക്തോത്തംസം ഝടിതി കുരു മാം കംസദമന 9
കിമുക്തൈര്ഭൂയോഭിസ്തവ ഹി കരുണാ യാവദുദിയാ-
ദഹം താവദ്ദേവ പ്രഹിതവിവിധാര്ത്തപ്രലപിതഃ
പുരഃ ക്ലൃപ്തേ പാദേ വരദ തവ നേഷ്യാമി ദിവസാന്
യഥാശക്തി വ്യക്തം നതിനുതിനിഷേവാ വിരചയന് 10
സർവത്ര ഗോവിന്ദ നാമ സങ്കീർത്തനം ഗോവിന്ദ ഗോവിന്ദ
ഹരിഃ ഓം
No comments:
Post a Comment