അദ്ധ്യായം 9
രാജവിദ്യാരാജഗുഹ്യയോഗം
അഥ നവമോഽധ്യായഃ |
ശ്രീഭഗവാനുവാച |
ഇദം തു തേ ഗുഹ്യതമം പ്രവക്ഷ്യാമ്യനസൂയവേ |
ജ്ഞാനം വിജ്ഞാനസഹിതം യജ്ജ്ഞാത്വാ മോക്ഷ്യസേഽശുഭാത് || 1 ||
രാജവിദ്യാ രാജഗുഹ്യം പവിത്രമിദമുത്തമം |
പ്രത്യക്ഷാവഗമം ധര്മ്യം സുസുഖം കര്തുമവ്യയം || 2 ||
അശ്രദ്ദധാനാഃ പുരുഷാ ധര്മസ്യാസ്യ പരംതപ |
അപ്രാപ്യ മാം നിവര്തംതേ മൃത്യുസംസാരവര്ത്മനി || 3 ||
മയാ തതമിദം സര്വം ജഗദവ്യക്തമൂര്തിനാ |
മത്സ്ഥാനി സര്വഭൂതാനി ന ചാഹം തേഷ്വവസ്ഥിതഃ || 4 ||
ന ച മത്സ്ഥാനി ഭൂതാനി പശ്യ മേ യോഗമൈശ്വരം |
ഭൂതഭൃന്ന ച ഭൂതസ്ഥോ മമാത്മാ ഭൂതഭാവനഃ || 5 ||
യഥാകാശസ്ഥിതോ നിത്യം വായുഃ സര്വത്രഗോ മഹാൻ |
തഥാ സര്വാണി ഭൂതാനി മത്സ്ഥാനീത്യുപധാരയ || 6 ||
സര്വഭൂതാനി കൌംതേയ പ്രകൃതിം യാംതി മാമികാമ് |
കല്പക്ഷയേ പുനസ്താനി കല്പാദൌ വിസൃജാമ്യഹം || 7 ||
പ്രകൃതിം സ്വാമവഷ്ടഭ്യ വിസൃജാമി പുനഃ പുനഃ |
ഭൂതഗ്രാമമിമം കൃത്സ്നമവശം പ്രകൃതേര്വശാത് || 8 ||
ന ച മാം താനി കര്മാണി നിബധ്നംതി ധനംജയ |
ഉദാസീനവദാസീനമസക്തം തേഷു കര്മസു || 9 ||
മയാധ്യക്ഷേണ പ്രകൃതിഃ സൂയതേ സചരാചരം |
ഹേതുനാനേന കൌംതേയ ജഗദ്വിപരിവര്തതേ || 10 ||
അവജാനംതി മാം മൂഢാ മാനുഷീം തനുമാശ്രിതം |
പരം ഭാവമജാനംതോ മമ ഭൂതമഹേശ്വരം || 11 ||
മോഘാശാ മോഘകര്മാണോ മോഘജ്ഞാനാ വിചേതസഃ |
രാക്ഷസീമാസുരീം ചൈവ പ്രകൃതിം മോഹിനീം ശ്രിതാഃ || 12 ||
മഹാത്മാനസ്തു മാം പാര്ഥ ദൈവീം പ്രകൃതിമാശ്രിതാഃ |
ഭജംത്യനന്യമനസോ ജ്ഞാത്വാ ഭൂതാദിമവ്യയം || 13 ||
സതതം കീര്തയംതോ മാം യതംതശ്ച ദൃഢവ്രതാഃ |
നമസ്യംതശ്ച മാം ഭക്ത്യാ നിത്യയുക്താ ഉപാസതേ || 14 ||
ജ്ഞാനയജ്ഞേന ചാപ്യന്യേ യജംതോ മാമുപാസതേ |
ഏകത്വേന പൃഥക്ത്വേന ബഹുധാ വിശ്വതോമുഖം || 15 ||
അഹം ക്രതുരഹം യജ്ഞഃ സ്വധാഹമഹമൌഷധം |
മംത്രോഽഹമഹമേവാജ്യമഹമഗ്നിരഹം ഹുതം || 16 ||
പിതാഹമസ്യ ജഗതോ മാതാ ധാതാ പിതാമഹഃ |
വേദ്യം പവിത്രമോംകാര ഋക്സാമ യജുരേവ ച || 17 ||
ഗതിര്ഭര്താ പ്രഭുഃ സാക്ഷീ നിവാസഃ ശരണം സുഹൃത് |
പ്രഭവഃ പ്രലയഃ സ്ഥാനം നിധാനം ബീജമവ്യയം || 18 ||
തപാമ്യഹമഹം വര്ഷം നിഗൃഹ്ണാമ്യുത്സൃജാമി ച |
അമൃതം ചൈവ മൃത്യുശ്ച സദസച്ചാഹമര്ജുന || 19 ||
ത്രൈവിദ്യാ മാം സോമപാഃ പൂതപാപാ യജ്ഞൈരിഷ്ട്വാ സ്വര്ഗതിം പ്രാര്ഥയംതേ|
തേ പുണ്യമാസാദ്യ സുരേംദ്രലോകമശ്നംതി ദിവ്യാംദിവി ദേവഭോഗാൻ || 20 ||
തേ തം ഭുക്ത്വാ സ്വര്ഗലോകം വിശാലം ക്ഷീണേ പുണ്യേ മര്ത്യലോകം വിശംതി|
ഏവം ത്രയീധര്മമനുപ്രപന്നാ ഗതാഗതം കാമകാമാ ലഭംതേ || 21 ||
അനന്യാശ്ചിംതയംതോ മാം യേ ജനാഃ പര്യുപാസതേ |
ഏഷാം നിത്യാഭിയുക്താനാം യോഗക്ഷേമം വഹാമ്യഹം || 22||
യേഽപ്യന്യദേവതാ ഭക്താ യജംതേ ശ്രദ്ധയാന്വിതാഃ |
തേഽപി മാമേവ കൌംതേയ യജംത്യവിധിപൂര്വകം || 23 ||
അഹം ഹി സര്വയജ്ഞാനാം ഭോക്താ ച പ്രഭുരേവ ച |
ന തു മാമഭിജാനംതി തത്ത്വേനാതശ്ച്യവംതി തേ || 24 ||
യാംതി ദേവവ്രതാ ദേവാന്പിതൄന്യാംതി പിതൃവ്രതാഃ |
ഭൂതാനി യാംതി ഭൂതേജ്യാ യാംതി മദ്യാജിനോഽപി മാം || 25 ||
പത്രം പുഷ്പം ഫലം തോയം യോ മേ ഭക്ത്യാ പ്രയച്ഛതി |
തദഹം ഭക്ത്യുപഹൃതമശ്നാമി പ്രയതാത്മനഃ || 26 ||
യത്കരോഷി യദശ്നാസി യജ്ജുഹോഷി ദദാസി യത് |
യത്തപസ്യസി കൌംതേയ തത്കുരുഷ്വ മദര്പണം || 27 ||
ശുഭാശുഭഫലൈരേവം മോക്ഷ്യസേ കര്മബംധനൈഃ |
സംന്യാസയോഗയുക്താത്മാ വിമുക്തോ മാമുപൈഷ്യസി || 28 ||
സമോഽഹം സര്വഭൂതേഷു ന മേ ദ്വേഷ്യോഽസ്തി ന പ്രിയഃ |
യേ ഭജംതി തു മാം ഭക്ത്യാ മയി തേ തേഷു ചാപ്യഹം || 29 ||
അപി ചേത്സുദുരാചാരോ ഭജതേ മാമനന്യഭാക് |
സാധുരേവ സ മംതവ്യഃ സമ്യഗ്വ്യവസിതോ ഹി സഃ || 30 ||
ക്ഷിപ്രം ഭവതി ധര്മാത്മാ ശശ്വച്ഛാംതിം നിഗച്ഛതി |
കൌംതേയ പ്രതിജാനീഹി ന മേ ഭക്തഃ പ്രണശ്യതി || 31 ||
മാം ഹി പാര്ഥ വ്യപാശ്രിത്യ യേഽപി സ്യുഃ പാപയോനയഃ |
സ്ത്രിയോ വൈശ്യാസ്തഥാ ശൂദ്രാസ്തേഽപി യാംതി പരാം ഗതിം || 32 ||
കിം പുനര്ബ്രാഹ്മണാഃ പുണ്യാ ഭക്താ രാജര്ഷയസ്തഥാ |
അനിത്യമസുഖം ലോകമിമം പ്രാപ്യ ഭജസ്വ മാം || 33 ||
മന്മനാ ഭവ മദ്ഭക്തോ മദ്യാജീ മാം നമസ്കുരു |
മാമേവൈഷ്യസി യുക്ത്വൈവമാത്മാനം മത്പരായണഃ || 34 ||
ഓം തത്സദിതി ശ്രീമദ്ഭഗവദ്ഗീതാസൂപനിഷത്സു ബ്രഹ്മവിദ്യായാം യോഗശാസ്ത്രേ ശ്രീകൃഷ്ണാര്ജുനസംവാദേ
രാജവിദ്യാരാജഗുഹ്യയോഗോ നാമ നവമോഽധ്യായഃ
No comments:
Post a Comment