ദശകം 10
                                           

വൈകുണ്ഠ വര്‍ദ്ധിതബലോഥ ഭവത്പ്രസാദാ-
ദംഭോജയോനിരസൃജത് കില ജീവദേഹാന്‍ 
സ്ഥാസ്നൂനി ഭൂരുഹമയാനി തഥാ തിരശ്ച‍ാം
ജാതിം മനുഷ്യനിവഹാനപി ദേവഭേദാ‍ന്‍  1 

മിത്ഥ്യാഗ്രഹാസ്മിമതിരാഗവികോപഭീതി-
രജ്ഞാനവൃത്തിമിതി പഞ്ചവിധ‍ാം സ സൃഷ്ട്വാ 
ഉദ്ദാമതാമസപദാര്‍ത്ഥവിധാനദൂന –
സ്തേനേ ത്വദീയചരണസ്മരണം വിശുദ്ധ്യൈ  2 

താവത് സസര്‍ജ മനസാ സനകം സനന്ദം
ഭൂയ: സനാതനമുനിം ച സനത്കുമാരം 
തേ സൃഷ്ടികര്‍മ്മണി തു തേന നിയുജ്യമാനാ-
സ്ത്വത്പാദഭക്തിരസികാ ജഗൃഹുര്‍ന്ന വാണീം  3 

താവത് പ്രകോപമുദിതം പ്രതിരുന്ധതോസ്യ
ഭ്രൂമധ്യതോജനി മൃഡോ ഭവദേകദേശ: 
നാമാനി മേ കുരു പദാനി ച ഹാ വിരിഞ്ചേ-
ത്യാദൗ രുരോദ കില തേന സ രുദ്രനാമാ  4 

ഏകാദശാഹ്വയതയാ ച വിഭിന്നരൂപം
രുദ്രം വിധായ ദയിതാ വനിതാശ്ച ദത്വാ 
താവന്ത്യദത്ത ച പദാനി ഭവത്പ്രണുന്ന:
പ്രാഹ പ്രജാവിരചനായ ച സാദരം തം  5 

രുദ്രാഭിസൃഷ്ടഭയദാകൃതിരുദ്രസംഘ-
സമ്പൂര്യമാണഭുവനത്രയഭീതചേതാ: 
മാ മാ പ്രജാ: സൃജ തപശ്ചര മംഗലായേ-
ത്യാചഷ്ട തം കമലഭൂര്ഭവദീരിതാത്മാ 6 

തസ്യാഥ സര്‍ഗ്ഗരസികസ്യ മരീചിരത്രി-
സ്തത്ര‍ാംഗിരാ: ക്രതുമുനി: പുലഹ: പുലസ്ത്യ: 
അംഗാദജായത ഭൃഗുശ്ച വസിഷ്ഠദക്ഷൗ
ശ്രീനാരദശ്ച ഭഗവന്‍ ഭവദംഘ്രിദാസ:  7 

ധര്‍മ്മാദികാനഭിസൃജന്നഥ കര്‍ദ്ദമം ച
വാണീം വിധായ വിധിരംഗജസംകുലോഭൂത് 
ത്വദ്ബോധിതൈസ്സനകദക്ഷമുഖൈസ്തനൂജൈ-
രുദ്ബോധിതശ്ച വിരരാമ തമോ വിമുഞ്ചന്‍  8  

വേദാന്‍ പുരാണനിവഹാനപി സര്‍വ്വവിദ്യാ:
കുര്‍വന്‍ നിജാനനഗണാച്ചതുരാനനോസൗ 
പുത്രേഷു തേഷു വിനിധായ സ സര്‍ഗവൃദ്ധി-
മപ്രാപ്നുവംസ്തവ പദാമ്ബുജമാശ്രിതോഭൂത് 9 

ജാനന്നുപായമഥ ദേഹമജോ വിഭജ്യ
സ്രീപുംസഭാവമഭജന്മനുതദ്വധൂഭ്യ‍ാം 
താഭ്യ‍ാം ച മാനുഷകുലാനി വിവര്‍ദ്ധയംസ്ത്വം
ഗോവിന്ദ മാരുതപുരേശ നിരുന്ധി രോഗാന്‍  10 

                                                      ഹരിഃ ഓം