ദശകം 13 
                                 

ഹിരണ്യാക്ഷം താവദ്വരദ ഭവദന്വേഷണപരം
ചരന്തം സ‍ാംവര്‍ത്തേ പയസി നിജജംഘാപരിമിതേ 
ഭവദ്ഭക്തോ ഗത്വാ കപടപടുധീര്‍ന്നാരദമുനി:
ശനൈരൂചേ നന്ദന്‍ ദനുജമപി നിന്ദംസ്തവ ബലം  1 

സ മായാവീ വിഷ്ണുര്‍ഹരതി ഭവദീയ‍ാം വസുമതീം
പ്രഭോ കഷ്ടം കഷ്ടം കിമിദമിതി തേനാഭിഗദിത: 
നദന് ക്വാസൗ ക്വാസവിതി സ മുനിനാ ദര്‍ശിതപഥോ
ഭവന്തം സമ്പ്രാപദ്ധരണിധരമുദ്യന്തമുദകാത്  2 

അഹോ ആരണ്യോയം മൃഗ ഇതി ഹസന്തം ബഹുതരൈര്‍ –
ദുരുക്തൈര്‍വിധ്യന്തം ദിതിസുതമവജ്ഞായ ഭഗവന്‍ 
മഹീം ദൃഷ്ട്വാ ദംഷ്ട്രാശിരസി ചകിത‍ാം സ്വേന മഹസാ
പയോധാവാധായ പ്രസഭമുദയുംഥാ മൃധവിധൗ 3 

ഗദാപാണൗ ദൈത്യേ ത്വമപി ഹി ഗൃഹീതോന്നതഗദോ
നിയുദ്ധേന ക്രീഡന്‍ ഘടഘടരവോദ്ഘുഷ്ടവിയതാ 
രണാലോകൗത്സുക്യാന്മിലതി സുരസംഘേ ദ്രുതമമും
നിരുന്ധ്യാ: സന്ധ്യാത: പ്രഥമമിതി ധാത്രാ ജഗദിഷേ 4 

ഗദോന്മര്‍ദ്ദേ തസ്മിംസ്തവ ഖലു ഗദായ‍ാം ദിതിഭുവോ
ഗദാഘാതാദ്ഭൂമൗ ഝടിതി പതിതായാമഹഹ! ഭോ: 
മൃദുസ്മേരാസ്യസ്ത്വം ദനുജകുലനിര്‍മ്മുലനചണം
മഹാചക്രം സ്മൃത്വാ കരഭുവി ദധാനോ രുരുചിഷേ 5 

തത: ശൂലം കാലപ്രതിമരുഷി ദൈത്യേ വിസൃജതി
ത്വയി ഛിന്ദത്യേനത് കരകലിതചക്രപ്രഹരണാത് 
സമാരുഷ്ടോ മുഷ്ട്യാ സ ഖലു വിതുദംസ്ത്വ‍ാം സമതനോത്
ഗലന്മായേ മായാസ്ത്വയി കില ജഗന്മോഹനകരീ:  6 

ഭവച്ചക്രജ്യോതിഷ്കണലവനിപാതേന വിധുതേ
തതോ മായാചക്രേ വിതതഘനരോഷാന്ധമനസം 
ഗരിഷ്ഠാഭിര്‍മുഷ്ടിപ്രഹൃതിഭിരഭിഘ്നന്തമസുരം
കരാഗ്രേണ ശ്രവണപദമൂലേ നിരവധീ:  7 

മഹാകായ: സോയം തവ ചരണപാതപ്രമഥിതോ
ഗലദ്രക്തോ വക്ത്രാദപതദൃഷിഭി: ശ്ലാഘിതഹതി: 
തദാ ത്വാമുദ്ദാമപ്രമദഭരവിദ്യോതിഹൃദയാ
മുനീന്ദ്രാ: സാന്ദ്രാഭി: സ്തുതിഭിരനുവന്നധ്വരതനും  8 

ത്വചി ഛന്ദോ രോമസ്വപി കുശഗണശ്ചക്ഷുഷി ഘൃതം
ചതുര്ഹോതാരോംഘ്രൗ സ്രുഗപി വദനേ ചോദര ഇഡാ 
ഗ്രഹാ ജിഹ്വായ‍ാം തേ പരപുരുഷ കര്‍ണ്ണേ ച ചമസാ
വിഭോ സോമോ വീര്യം വരദ ഗലദേശേപ്യുപസദ: 9 

മുനീന്ദ്രൈരിത്യാദിസ്തവനമുഖരൈര്‍മോദിതമനാ
മഹീയസ്യാ മൂര്‍ത്ത്യാ വിമലതരകീര്‍ത്ത്യാ ച വിലസ‍ന്‍
സ്വധിഷ്ണ്യം സമ്പ്രാപ്ത: സുഖരസവിഹാരീ മധുരിപോ
നിരുന്ധ്യാ രോഗം മേ സകലമപി വാതാലയപതേ  10 

                                                   ഹരിഃ ഓം