അഞ്ജനശ്രീധര

അഞ്ജനശ്രീധര ചാരുമൂർത്തേ കൃഷ്ണ 

അഞ്ജലികൂപ്പി വണങ്ങിടുന്നേൻ 

ആനന്ദാലങ്കാര വാസുദേവാ കൃഷ്ണാ 

ആതങ്കമെലാമകറ്റിടേണേ 

ഇന്ദിരാനാഥ ജഗന്നിവാസാ കൃഷ്ണ 

ഇന്നെന്റെ മുൻപിൽ  വിളങ്ങിടേണേ

ഈരേഴുലകിനുമേകനാഥാ കൃഷ്ണ 

ഈരഞ്ചുദിക്കും നിറഞ്ഞരൂപാ 

ഉണ്ണിഗോപാലാ കമലനേത്ര കൃഷ്ണ 

ഉള്ളിൽ നീ വന്നു വിളങ്ങിടേണേ 

ഊഴിയിൽ വന്ന് പിറന്ന നാഥ കൃഷ്ണ 

ഊനംകൂടാതെ തുണച്ചീടേണേ

എന്നുള്ളിലുള്ളൊരു താപമെല്ലാം കൃഷ്ണ 

എന്നുണ്ണിക്കൃഷ്ണ ശമിപ്പിക്കണേ 

ഏടലർബാണനു തുല്യമൂർത്തേ കൃഷ്ണ 

ഏറിയ മോദേന കൈതൊഴുന്നേൻ 

ഐഹികമായ സുഖത്തിലഹോ കൃഷ്ണ 

അയ്യോ എനിക്കൊരു മോഹമില്ലേ 

ഒട്ടല്ല കൗതുകമന്തരംഗേ കൃഷ്ണ 

ഓമൽതിരുമേനി ഭംഗി കാണ്മാൻ 

ഓടക്കുഴൽവിളി മേളത്തോടെ കൃഷ്ണ ഓടിവരികെന്റെ ഗോപബാലാ 

ഔദാര്യകോമള കേളിശീല കൃഷ്ണ 

ഔപമ്യമില്ല ഗുണങ്ങൾക്കേതും 

അംബുജലോചന നിൻപാദപങ്കജ -

മമ്പോടു ഞാനിതാ കുമ്പിടുന്നേൻ കൃഷ്ണ 

അത്യന്തസുന്ദര നന്ദസൂനോ കൃഷ്ണ 

അത്തൽ കളഞ്ഞെന്നെ പാലിക്കണേ 

കൃഷ്ണാ മുകിൽവർണ്ണ വൃഷ്ണികുലേശ്വരാ 

കൃഷ്ണാംബുജേക്ഷണ കൈതൊഴുന്നേൻ 

കൃഷ്ണ ഹരേ ജയ കൃഷ്ണ ഹരേ ജയ 

കൃഷ്ണ ഹരേ ജയ കൃഷ്ണ ഹരേ!