ശ്രീമദ് നാരായണീയം
വിരാട് സ്വരൂപ വർണനം
ദശകം 6
ഏവം ചതുര്ദശജഗന്മയതാം ഗതസ്യ
പാതാളമീശ തവ പാദതലം വദന്തി
പാദോര്ദ്ധ്വദേശമപി ദേവ രസാതലം തേ
ഗുല്ഫദ്വയം ഖലു മഹാതലമദ്ഭുതാത്മന് 1
ജംഘേ തലാതലമഥോ സുതലം ച ജാനൂ
കിഞ്ചോരുഭാഗയുഗലം വിതലാതലേ ദ്വേ
ക്ഷോണീതലം ജഘനംമംബരമംഗ നാഭിര് -
വക്ഷശ്ച ശക്രനിലയസ്തവ ചക്രപാണേ 2
ഗ്രീവാ മഹസ്തവ മുഖം ച ജനസ്തപസ്തു
ഫാലം ശിരസ്തവ സമസ്തമയസ്യ സത്യം
ഏവം ജഗന്മയതനോ ജഗദാശ്രിതൈര-
പ്യന്യൈര്നിബദ്ധവപുഷേ ഭഗവന്നമസ്തേ 3
.ത്വദ്ബ്രഹ്മരന്ധ്രപദമീശ്വര വിശ്വകന്ദ
ഛന്ദാംസി കേശവ ഘനാസ്തവ കേശപാശാ:
ഉല്ലാസിചില്ലിയുഗളം ദ്രുഹിണസ്യ ഗേഹം
പക്ഷ്മാണി രാത്രിദിവസൗ സവിതാ ച നേത്രൈ 4
നിശ്ശേഷവിശ്വരചനാ ച കടാക്ഷമോക്ഷ:
കര്ണ്ണൗ ദിശോശ്വിയുഗലം തവ നാസികേ ദ്വേ
ലോഭത്രപേ ച ഭഗവന്നധരോത്തരോഷ്ഠൗ
താരാഗണാശ്ച ദശനാ: ശമനശ്ച ദംഷ്ട്രാ 5
മായാ വിലാസഹസിതം ശ്വസിതം സമീരോ
ജിഹ്വാ ജലം വചനമീശ ശകുന്തപങ്ക്തി:
സിദ്ധാദയ: സ്വരഗണാ മുഖരന്ധ്രമഗ്നിര് –
ദേവാ ഭുജാ: സ്തനയുഗം തവ ധര്മ്മദേവ: 6
പൃഷ്ഠം ത്വധര്മ്മ ഇഹ ദേവ മന: സുധാംശു –
രവ്യക്തമേവ ഹൃദയംബുജമംബുജാക്ഷ |
കുക്ഷി: സമുദ്രനിവഹാ വസനം തു സന്ധ്യേ
ശേഫ: പ്രജാപതിരസൗ വൃഷണൗ ച മിത്ര: 7
ശ്രോണി സ്ഥലം മൃഗഗണ പടയോർ നഖാ സ്തേ
ഹസ്ത്യുഷ്ട്രസൈന്ധവമുഖാ ഗമനം തു കാല:
വിപ്രാദിവര്ണ്ണഭവനം വദനാബ്ജബാഹു-
ചാരൂരുയുഗ്മചരണം കരുണാംബുധേ തേ 8
സംസാരചക്രമയി ചക്രധര ക്രിയാസ്തേ
വീര്യം മഹാസുരഗണോസ്ഥികുലാനി ശൈലാ:
നാഡ്യസ്സരിത്സമുദയസ്തരവശ്ച രോമ
ജീയാദിദം വപുരനിര്വചനീയമീശ 9
ഈദൃഗ്ജഗന്മയവപുസ്തവ കര്മ്മഭാജാം
കര്മവസാനസമയേ സ്മരണീയമാഹു:
തസ്യാന്തരാത്മവപുഷേ വിമലാത്മനേ തേ
വാതാലയാധിപ നമോസ്തു നിരുന്ധി രോഗാന് 10
സർവത്ര ഗോവിന്ദ നാമ സങ്കീർത്തനം ഗോവിന്ദ ഗോവിന്ദ
ഹരിഃ ഓം
No comments:
Post a Comment